Storia

Immagine decorativa

L grop di Studafech Volontères de Soraga l vegn metù sù a na vida formala del 1955 co la Deliberazion del Consei de Comun de Soraga n. 17 dai 8 de mèrz del '55, vardèda fora da la Jonta Provinzièla de Trent ai 15 de oril del '55 sub. n. 7210/I-b. 

Dant, aboncont, l'era stat metù sù, enceben che no l sie stat recognosciù a na vida formala, n grop de jent volontadiva che, tel besegn, sporjea sie didament. Fajea pèrt del prum grop organich di studafech de Soraga 15 volontadives, e Decrestina Antonio (de Lucol) l lo à ret enscin al 1970, canche l se à tirà fora dal grop. Da enlouta à tout sù la encèria desche Comandant l segnor Pellegrin Marco, che à sport sie servije enscin al 1996, canche no l'é più stat member atif del grop, doventan n member onorarie. Dò, chesta encèria desche comandant di Studafech Volontadives de Soraga, la é stata touta sù da Zulian Luca

Immagine decorativa

Timpruma chest grop l’aea a la leta na pompa a man, arpejon de veies studafech che lurèa ensema con etres gropes de Fascia canche Soraga fajea amò pèrt di Comuns de Vich e de Poza. I Studafech i cognea se tirèr dò a man l cèr sun chel che vegnìa pojà la pompa e i pec èrc che l’era a la leta, opuramenter se se emprevalea de ciavai e bues. Del 1958 l’é stat comprà la pruma pompa a motor che, ajache mencèa mesi adaté, i studafech cognea se tirèr dò, o i se tolea dò col prum meso che i troèa. Te situazions de pericol o per evenc fora da paìsc (desche per ejempie l convegn distretuèl anuèl) la soluzion per chest problem l’era chela de durèr l furgon de un om da Soraga che venea fruc. Dò aer domanà sacotanta outes finanziamenc a desvalives enc (Comun de Soraga, Provinzia de Trent, Federazion di Studafech del Trentin), zacan del 1962 l’é stat comprà l prum meso, na FIAT Campagnola de seconda man, che consentìa de trasportèr Studafech e motopompa. Del 1972 l’é stat dat ite chest meso e se à podù se tor fora na neva Campagnola.

Del 1978 l’é stat comprà na seconda pompa a motor, che aea sie carel per l traport, e con chest se portèa ence na pèrt di èrc.

Del 1980 l grop l se à endotà ence de n furgon Ford Transit durà per l trasport di studafech e de la pompa a motor; dant se durèa la Campagnola. Del 1985 l grop l’à podù se emprevaler de n botejin (carel per se parèr dal fech crepà fora te bosch) che se se tirèa dò co la campagnola e che, de gra a sia bot da 500 litres, volea dir fèr n vèrech inant per i intervenc spedienc de socors. Del 1990 l’é stat comprà n meso Land Rover 90 che, estra che tirèr l carel con sù la pompa a motor, l podea trasportèr ence 6 Studafech, slejieran l peis del furgon Ford Transit. Del 1992 n ghest forest da Milan ge à regalà al grop n meso Fiat Campagnola, che enlouta l vegn fat jù e durà.

Immagine decorativa

Del 1996, vedù la gran ocajion sporta dal grop di Studafech de Pianizza di Sopra, te la Provinzia de Busan, che enlouta mudèa fora sia autobot, l grop de Soraga l ge à comprà jù chest meso che sodesfea en dut e per dut sie besegnes. Del 1997, per agiornèr la lingia di mesi de chest grop, l’é stat declarà de no poder più se emprevaler di doi mesi FIAT Campagnola  e l’é stat comprà n nef meso Land Rover 130 che l’é stat enjignà e endotà de strumenc desvalives de prum socors. Del 2001, dò ge aer regalà l meso Ford Transit a na comunità de aiut, l’é stat enjontà ite te la lingia di mesi n auter Land Rover 130 da durèr desche Pick Up (con n casson da poder corir) per poder trasportèr n grop de 5 studafech e  desvalives èrc aldò del besegn desche n aparat spezièl da poder trasportèr col jolier e da durèr contra l mèl da fech te bosch che ne à prestà n distret.

Dal 1955 al 1985 l grop di Studafech de Soraga l’é metù adum da 15 volontères; dò l’é stat palesà l besegn de smaorèr l numer di studafech enscin a 18 jent e del 1995 enscin a 22 jent. Del 1996 l’é stat metù su n grop de arleves, metù adum da 9 bec joenec