Ti trovi in:

Home » Mapa de Fascia » Gejies

Menu di navigazione

Mapa de Fascia

Gejies

Immagine decorativa

Te Fascia l'é sacotenc lesc de cult che te pes jir a veder e descorir te sia beleza.

La neves che vegn scrit te chesta sezion les vegn cà dal liber "Testimonianze di storia e d'arte nelle valli ladine", scrit da Eugen Trapp e publicà del 2006 da l'istitut ladin Micura de Rü.

 

 

 

Immagine decorativa

La pìcola gejia dedichèda a la Conzeta e che la é stata fata sù del 1662 la é tel zenter de la frazion de Barbide. Te chesta gejia l'é jit sacotenc pelegrins che à scomenzà a la decorèr con n muie de ancones. Defat, la Madona de Barbida l'à abù na gran emportanza per chel che revèrda la venerazion de Maria. Defora, sia parbuda la é de stil prum baroch; daìte l parei l'é spartì da pilèstres, sun chi che l'é depent fasces e al post del cornijon se lec la scrita "Regina concepita senza peccato originale"

Immagine decorativa

Se peissa che chesta gejia de Pian la sie stata fata sù endèna l XVIII secol. La é stata fata sù sun n col soravìa la gejia di Sènc Felip e Giacum de Ciampedel

Immagine decorativa

La gejia de la Madona de l'Aiut a Poza la é stata fenida del 1957, aldò del projet de l'architet Dario Albertini. Defora la strutura l'à la parbuda del stil gotich con la facèda no lurèda fora con te mez l ciampanil.

Immagine decorativa

La pìcola gejia de Gries l'é na desmostrazion de la gran venerazion che la jent à envers la Madona de la Neif, dassen preèda fora per la Èlpes endèna l XVII secol. Defora sia parbuda la é del stil del prum baroch

Immagine decorativa

La gejia de la Madona del Chermin la é loghèda enlongiajù la Strèda Statèla n. 48 de la Dolomites a Fontanac. Daìte se pel se goder testimonianzes de depenc del stil baroch sul reout de l'abside: la Vergine co la corona de steiles, con sora sie cef la colomba del Spirit Sènt e vindedò n ciel da nigoles. Su l'Èrch Sènt se pel lejer la scrita depenta BEATAE MARIAE / VIRGIN DE MONTE / CARMELO DEDICATA. 

Immagine decorativa

La gejia, che timpruma la era dedichèda a Sènta Maria di Agnoi, la é stata fata sù del 1825. La é a Ciampestrin, frazion de Mazin, enlongiajù la Strèda Statèla de la Dolomites. Se trata de na strutura fata sù "ex voto". 

Immagine decorativa

Chesta gejia la é sun Tamion. La é stata fata sù del 1708, data che la é scrita su l'èrch sènt.

Immagine decorativa

La gejia del Sacro Cher de Gejù la é stata fata sù aldò del voler del Decan de Fascia, don Fortunato Rossi, per ge fèr front al smaorament demografich de Cianacei e al svilup de chest raion desche zona turistica

Immagine decorativa

La fondazion de chesta gejia de Penìa la é leèda a na lejenda che conta che timpruma l'era stat pervedù de fèr sù chesta gejia te n auter post, ma che dapò i ucie i à menà dut l saolon che servìa per fèr sù la strutura sun "Col de lagnol", fajan entener a chesta vida l voler divin de veder fèr sù la gejia te chest lech

Immagine decorativa

Se conta che la gejiola de Sèn Borcan sie l frabicat religiuos più veie de duta Moena. Daìte se pel veder i depenc a frech, che da pech i é stac restauré, e che se peissa che i sie stac fac endèna la seconda metà del '400, l bel celor de legn lurà fora dal zipiador da Moena Giovanni Guadagnini e n Crist dassen maraveous, ence chest de legn, che se stima che l sie del 600.

Immagine decorativa

La gejia de Sèn Florian la é loghèda tel zenter storich de Cianacei. L'é stat durà n muie de temp per la fèr sù. La medema la é stata sagrèda del 1603

Immagine decorativa

Chesta gejia la é stata fata su sun Peniola anter l 1729 e l 1732, dò da na ègajon che, per grazia, no à fat n muie de dans. Desche segn de recognoscienza per se aer salvà dal pericol, la familia Donei e l preve pitor Martino Gabrielli, a chi che ge vegn recognosciù la maor pèrt de la òperes en esser daìte, i à fat fèr sù chesta gejia che la é stata dedichèda a Sèn Jan Nepomuceno martire, cognosciù da la jent desche sènt protetor da la ègajons. 

Immagine decorativa

Chesta gejia la é sun Valongia e la é stata fata su del 1750 e restaurèda del 1944. Enlouta M.Anes, su la facèda, l'à depent n gran Crist Re, che dò l'é stat corì del 1980. 

Immagine decorativa

La gejia de Sèn Jan, a Vich, l'é n frabicat gotich del 400 fat su te mez a la Dolomites. L'é la Pieif de duta Fascia, zenter religiuous e lech de referiment per la Comunanza de Fascia. 

Immagine decorativa

La gejiola, che la fèsc pèrt de la piovanìa de Moena, la é loghèda tel zenter de la frazion de Sort e la é stata fata sù del 1645. La é stata sagrèda a na vida ofizièla demò del 1703 dal Prinz Piscop de Trent, Johann Michael von Spaur. La é scempia ma daìte l'à n muie de depenc. L ciampanil "a cigola" e la pèla de l'utèr col depent de Sèn Josef, fat da G. Vadagnini, i à dassen n gran valor. 

Immagine decorativa

La gejia dedichèda a Sèn Lazer la é ja L Forn, frazion de Moena. La é stata fata sù del 1517 e sagrèda del 1526. Daìte chesta gejia l'à la parbuda del stil gotich e su l'Utère Maor l'é logà n gran Crist de legn zipià fora da l'artist da Moena Zerilo Dellantonio. Se pel veder ence n chèder de Valentino Rovisi

Immagine decorativa

L frabicat l'é stat fat su del 1610 aldò del stil del gotich tardif; daìte l'é stat fat n gran lurier de restaure a na vida storicistica a scomenzèr dal 1896. La strutura defora la é n muie scempia, aboncont daìte se pel veder i bie depenc a fresch del pitor F.Bernard che l se à cruzià ence de l'Utère Maor, olache vindedò se pel veder l depent de Sèn Lorenz, protetor de Pera

Immagine decorativa

Se conta che la gejia la sie stata fata sù presciapech del 1447 ajache, en chel an, l'é stat documentà l testament del segnor Giovanni de Mattia, sun chel che l'é stat scrit de durèr i scioldi per fèr sù la gejia. Del 2000 l'é stat fat n gran lurier de restaure e l'é stat ripristinà l'impiant baroch

Immagine decorativa

La gejia, dedichèda a Sèn Roch, a Sèn Fabian e Sèn Bastian, la é tel zenter de Someda. La é stata fata sù del 1538 ma, ti egn, mìngol a la outa, la é stata fata fora e smaorèda. Defora se pel veder ghenao la doi fases prinzipales de canche la gejia la é stata fata sù: la pèrts del gotich tardif del ciampanil e la formes storicistiches de la navata. Daìte l'é la pèla de l'artist Rovisi co la cornisc e sun chest depent l'é l retrat de la Madona col Bambin e enlongiajù i Sènc Roch e Bastian.

Immagine decorativa

La gejia de Sènta Maria Madalena de Mazin la é stata fata sù del 1574 (età del gotich tardif) e smaorèda del 1894. Ence chesta gejia la é stata fata su enlongiajù la Strèda Statèla n. 48 de la Dolomites. À n gran valor la veia pèla tachèda sù soravìa l'usc che mena sun ciampanil: na Madona sul tron te anter a la nigoles col Bambin en pe sun brac, che benedesc. Enlongiajù l'é Sèn Gere e Sèn Florian. Te gejia, a man dreta troa lèrga l bel utèr dedicà a la Madona e a man cencia chel dedicà a Sènt'Antone. Ence la barconèda la é fornida su con de bie depenc.