Ti trovi in:

Home » Arees tematiches » I Studafech » Vich » I Volontadives

I Volontadives

Immagine decorativa

Te tia vita, da vèlch ora, nasc l besegn de poder fèr vèlch per i etres. E apontin te chest moment te vegn da pissèr, percheche te ès rejonà coi amisc che i é jà volontères, o percheche te é sozedù vèlch de particolèr, te sentes l besegn de didèr. Dapò per chest zachei se met ite te la Crousc Checena o Biencia, zachei doventa donator de sanch e se met ite te l’AVIS, etres amò vel doventèr Studafech, vèlch un se met ite tel Socors da mont, vèlch un l’é n bon tel setor de la musega e l doventa n musegant, duc aldò de sia carateritiches e gust, aldò de chel che ge sa più bel fèr. N’autra rejon che te podessa portèr a fèr chest vèrech l’é che te ves ge jir dò a la pedies de zachei: l père, l bèrba, l fra più gran l’é o l’é stat n volontadif, se rejona te cèsa, e te chel moment l joen l’enten che ence el l pel sporjer sie didament.

Tel Trentin l’é passa 5000 Studafech volontères e 220 studafech arleves spartii te 239 gropes te 223 comuns. Chisc Studafech i à passà na vijita medica e test spezifics, i à abù na formazion de basa coche carenea e l’é jent che met a la leta, desche volontadif, sie temp e sia capazitèdes.

Vigni grop l’é ret da n Comandant e da n Vizecomandant. I gropes i vegn metui adum te Unions Distretuèles (teritorie de più comuns  con cultura e tradizions pervalives). La Unions Distretuèles les é 13 e a cef de vigni Union l’é n Ispetor Distretuèl, che l’é l responsàbol di Studafech Volontères sul tegnir Trentin. La Unions dapò les fèsc pèrt pèrt de Federazions. L grop l’à la encèria de se cruzièr de la segureza de la jent, de stravardèr la cosses, de prevegnir e de ge fèr front a la desgrazies.

 

 

Vigni grop laora soraldut te sie ambit de Comun, te chel che l respon en dut e per dut al servije. Aldò de la sort e de la dimenjion de l’event, i gropes i met en esser l’intervent da soi o con etres a livel distretuèl o provinzièl; te chisc caji tol pèrt ence l grop profescionèl de Trent che l’à la competenza su la zità de Trent. La telefonèdes de socors (115) les vegn binèdes sù da la Zentrèla del grop permanent de Trent e chiò les vegn spartides fora ti desvalives gropes che i é endoté de pipser colee tras na rei radio provinzièla. L servije, struturà a chesta vida, l garantesc che l’intervent l sie spedient, che se posse intervegnir te dotrei menuc dal moment de la chiamèda de socors, ence ti raions periferics del Trentin. I gropes, amò apede, i laora en colaborazion col socors da mont, CAI, Trentino Emergenza 118, gropes de protezion zivila. Per poder ge fèr front e passèr fora la desgrazies coran e con n bon ejit, i gropes i é stac endoté  de fornimenta e de mesi aldò de la sort e de la spezifizità del servijes sporc, aldò de chisc criteries: mesi e fornimenta de basa a la leta de vigni grop, che l va ben per i besegnes de l’area che pervegn. Mesi e fornimenta per la unitèdes intercomunèles. Mesi e de fornimenta per la unons  distretuèles da durèr te arees dalbon granes de intervent. Mesi e fornimenta a livel provinzièl (grop permanent de Trent e Protezion Zivila) se sozet desgrazies a livel provinzièl e nazionèl. Per chel che vèrda l finanziament de la fornimenta, di mesi, di èrc e di materièi, se cruzia, a livel comunèl, la aministrazion provinzièla e de comun,  con apede vèlch contribut sport da la comunanza. Per la strutures soracomunèles (Unions) e provinzièles (grop permanent e Federazion) l finanziament l’é a cèria en dut e per dut de la Provinzia Autonoma de Trent