Orghegn istituzionèi
I orghegn istituzionèi del Comun General de Fascia l'é
- L Procurador
- L Consei de procura
- L Consei di ombolc
- L Consei General
L Comun General de Fascia l é n ent local teritorièl che l é stat metù su aldò del articol 8 de la lege costituzionèla dai 4 de dezember del 2017, n. 1 che à mudà, a chesta vida, l articol 102 del Statut de Autonomia de la Region Trentin-Sudtirol/Sudtirol.
Felicetti Edoardo, laureà en enjegneria da Moena, l é l Procurador del Comun General de Fascia. L é stat lità a la litazions dai 4 de mè 2025 con 2391 stimes, più avisa l 56,38%. L à tout sù l mandat ai 06.05.2025 co la proclamazion. L é a cef de na coalizion metuda adum da: 1) AUTONOMIA PER FASCIA; 2) FASSA.
L Consei de procura l é metù adum dal Procurador del Comun General, che l lo chiama ite e l lo rec, e da etres componenc nominé dal Procurador, che no i pel esser più che 6, cernui ence fora dal Consei General.
L Consei di Ombolc l é metù adum dai Ombolc di 6 Comuns de Fascia e l vegn ret dal Procurador. De chest Consei fèsc pèrt chisc comembres: Felicetti Edoardo, Kostner Alberto, Pederiva Valerio, Florian Giulio, Castelnuovo Fausto, Bernard Alessandro, Bernard Giovanni.
L Consei general del Comun General de Fascia l é l orghen raprejentatif de la comunanza e l é metù adum dal Procurador e da autres 28 comembres.
Chesta sezion la é dedichèda a la comiscions e ai gropes de lurier metui en esser tel Comun General de Fascia.