Ti trovi in:

Home » Mapa de Fascia » La mont

Menu di navigazione

Mapa de Fascia

La mont

Immagine decorativa

Te mez a la Dolomites, te Fascia, tel Trentin, se pel veder la più bela crepes de chest grop de monc: la Marmolèda, l Saslonch, l Ciadenac, l Sela e i Monciogn.

Da pech Fascia é doventèda na val turistica e i ghesc' pel se goder de bela vedudes, d'istà i pel jir a se rampeèr sun sacotenc parees de crep e d'invern i pel jir coi schi e co la brea sun portoes endrezé coche carenea 

Immagine decorativa

L grop del Ciadenac (per todesch Rosengarten – Gruppe o demò Rosengarten, per ladin Ciadenac o Vaiolon, per talian Catinaccio) l’é n grop de crepes de la Dolomites logà anter la Val de Dier, la val d’Ega e Fascia, tel parch naturèl del Sciliar. Sia caratatestica dassen particolèra l’é che sul fiorir del soreie e canche crepa l'elba (anterores), chesta crepes les doventa resa, fenomen visif che à inom enrosadira.

L'é doi inomes veiores con chi che vegn chiamà, da na man e da chel'autra, chest grop de monts, che vegn a esser l confin linguistich anter l mond ladin e chel todesch. Chel ladin, “Ciadenac”, “Catinaccio”, che l’é ence la reisc de l'inom talian più nef e che fèsc referiment, aldò de Karl Felix Wolff, al crep dolomitich tipich de chest grop de mont. L’auter inom, chel todesch “Rosengarten” durà maormenter da la man del Sudtirol, l’é atestà jà dal XV secol (1497 Rosengarten, 1506 Kopf am Rosengarten), e l fèsc referiment a la contìa de Re Laurin, volan ge dèr na spiegazion al fenomen de l’Enrosadira. Da chesta contìa vegn cà ence l’inom “Gartl” (l raion de pera zentrèl de la crepa più auta) che da dalènc se l veit sù bel bianch corì de neif jà bonora.

Leggi le informazioni dettagliate: www.wikipedia.irg
Immagine decorativa

Ai 26 de jugn del 2009, a Siviglia, la Dolomites les é states recognosciudes a na vida ofizièla da l'Unesco desche Patrimonie Mondièl Naturèl de l'Umanità. L'é n lech de gran enteress per la sacotanta jent che vegn a les veder da dut l mond e che vegn en vacanza. I Monti Pallidi, per ladin "Crepes Spavides", l'é crepes preziouses, maraveouses e fora de anter che palesea i sìmboi de na storia che à passa mile egn

Immagine decorativa

La Marmolèda l’é n grop de crepes de la Èlpes e sia ponta più auta l’é Ponta Penìa (3.343 m.).

 

L’inom Marmolèda, se no l’aessa n leam co la parola latina marmor “mèrmol”, l podessa aer na reisc indoeuropeèna greca “marmar” - che volessa dir lumenèr, sgalizèr. Bensegur vegn fat referiment al giacé. Se disc che sia formazion l'abie n leam con na lejenda che conta de na veia che, enceben che l’abie ciapà la cridèdes da la jent de paìsc, l’à fat ite l fegn la dì de la sègra, ai 5 de aost, (“Madona de la Neif”). De net l’à scomenzà a fiochèr. N'é vegnù jù na motae se à formà l giacé, che se veit amò ades. Sotite a chest giacé, no se sa da can, l’é amò chesta pera veia con sie fegn te tobià. 

Immagine decorativa

L grop del Sela l’é n grop de crepes de la Dolomites. L'é logà anter Gherdena e Badia (provinzia de Busan), Fascia (provinzia de Trent) e Fodom (Provinzia de Belun).

Per duta la valèdes en esser dintornvìa a chest grop de crepes, l Sela l’é l zenter de enteress per vigni sort de atività leèda a la mont e al turism.

N alpinist che cern de passèr n dì sun Sela, l pel cerner de fèr sacotanta ativitèdes.

Ajache l Sela l’à na forma torona, se pel ge fèr la roda fajan i cater jouves (Pordoi, Sela, Frea, e Campolongo) co la roda, co la moto o co l’auto, opuramenter d’invern coi schi, o a pe via per l’istà, da olache se pel se goder n panoram semper desvalif e che muda col passèr de la sajons, ma che l’à semper vindedò la mont del Sela. 

Immagine decorativa

L Saslonch (Langkofel per todesch e Sassolungo per talian) l’é n grop de crepes che spartesc Gherdena e Fascia.

Enceben che no sie n grop de crepes tant slarià fora, l’à dalbon sacotanta torns e parees, sun chi che, te duc chisc egn, à rampinà n muie de alpinisć, arjonjan de bie obietives. L parei nord del Saslonch, aut passa 1000 metres, l’é un anter chi più auc de duta la Èlpes.

Se pel ruèr sun ponta del Saslonch tras la via ferèda Oskar Schuster e tras la via normala che mena sù da la man sud – ovest. Se pel ruèr sun duta l’autra pontes tras vies alpinistiches.

A pe enveze, duc pel se goder a ge fèr la roda a chest grop de crepes, se n arloan te n percors che dura 4 – 5 ores, che ponta demez sun Sela e che rua fora per la uties Emilio Comici (2140 m), Vicenza (2250 m), Saspiat (2300 m), Sandro Pertini e Friedrich August. L dislivel de chesta raida l’é de presciapech 200 metres. Dal Jouf de Sela o da la Utia Vicenza se pel ruèr sun sforcela del Sasloch (2681 m),  aló da la Utia Toni Demetz. Da chiò ponta via l’impiant portamont che mena sun Sela. A pe se pel ruèr ence aló da la utia Demez se enarloan sul troi che ponta demez da chest impiat portamont; chest percors l’é zis sorì, ma ence ert, soraldut te l’ultim toch. 

Leggi le informazioni dettagliate: www.wikipedia.org