L servije se porta dant

l Comun general de Fascia l gestesc, co la delega di set comuns de Fascia, i servijes de regoeta, trasport e desgorta del refudam urban e assimilà.

L comun general de Fascia, (che dant l’era l Comprenjorie Ladin de Fascia – C11) a scomenzèr dal 1986 l gestesc co la delega di set comuns de Fascia, l servije de regoeta, trasport e desgorta del refudam urban e assimilà. Dant, i comuns i se cruzièa a na vida autonoma tant de la regoeta che de la desgorta de sie refudam urban; Moena e Soraga i desgorjea l refudam a na vida consorzièda con dotrei comuns de Fiem tras l’impiant per brujèr l refudam de Pardac aló da Stalimen; i etres comuns de Fascia i menèa sie refudam te la desćèria de comun de Mazin. Dò che duta la desćèries en esser sul teritorie e l’impiant per brujèr l refudam de Pardac i é stac seré, e dò che jun “Ciarlonch”, a Vich, l’é stat fat sù la stazion de trasferiment del refudam, te chel che amò anchecondì vegn menà e compatà i refudames urbans, che dapò per la desgorta finèla i vegnarà mené te desćèria, da de otober del 1986 inant, l Comprenjorie à tout l post di comuns te la gestion del servije del trasport finèl per la desgorta del refudam. Dapò, da la fin di egn nonanta enscin a ades, l’é stat metù a jir i servijes de regoeta di refudames desferenzié e che resta sun dut l teritorie, tolan l post di comuns ence te chesta fasa de la gestion. Ades l Comun general de Fascia l gestesc ence l Zenter de Regoeta de Materièi de Pera e i trasporc per l recuperament di refudames desferenzié mené ti zentres de Regoeta Materièi de comun de Moena, Soraga e Cianacei.