Comun General de Fascia - Servije Tagesmutter

COMUN GENERAL DE FASCIA Servije Tagesmutter – col 1m de aost 2022

Tagesmutter – col 1m de aost 2022

Co la deliberazion del Consei General N. 14-2022 dai 10.05.2022, l Comun General de Fascia l tol su dai Comuns la funzion di servijes sozio educatives per i fantolins, anter chi che l é pervedù ence l Servije per i Fantolins – Tagesmutter.

L projet per l Servije per i fantolins – Tagesmutter l é n servije personalisà per didèr fora i genitores che cogn jir a lurèr e che à de besegn de ge lascèr i fies a jent califichèda e de fuduzia.

“La Tagesmutter l é na persona che à na formazion che, en colaborazion con organismes de la Cooperazion sozièla o de utol sozièl zenza fins de vadagn, la educhea e la vèrda via un o più che un bez de autra families te sia majon o te n auter ambient adatà per dèr cures familières (L.P. dai 12 de mèrz del 2002 n. 4)

I lesc olache vegn sport l servije per i fantolins i vegn endrezé pissan a n ambient che l ge somea a chel de cèsa, con cojina, stua, cambra per dormir e comedità, pissé e adaté apontin per i fantolins. L servije per i fantolins l é out ai bec che à anter i 3 meisc e i 3 egn e, te oraries fora da scola, per bec scin ai 13 egn.

Tel servije per i fantolins la cèsa la vegn recognosciuda desche condizion spezifica e miora per sporjer educazion a la cures, al voler ben, a la segureza, a la autonomia e a l stèr ensema ai etres.

Sul tegnir de Fascia l servije Tagermutter l vegn sport a Moena, San Giovanni – Sèn Jan, Ciampedel e Cianacei.

L é n servije flessibol, da poder durèr 12 meisc al an, che dèsc l met de dezider l orarie co la coordenadora de referiment, podan, a chesta vida, se emprevaler del servije demò dotrei ores en dì e/o demò dotrei dis en setemèna.

L cost a l’ora per l servije l é:

€ 8,20 tout ite la sve (più che 80 ores al meis)
€ 8,80 tout ite la sve (scin a 80 ores al meis)
€ 10,70 tout ite la sve (dì de festa, de net e straordenères de dì)
€ 12,80 tout ite la sve (dì de festa de net)

M.V.: l é pervedù n smendrament del 10% se l é frèdes che va tel medemo orarie.

Per chest servije, l Comun General de Fascia l ge dèsc n contribut orarie a la families che stèsc te un di comuns de Fascia, calcolà metan en doura l indicator ICEF (indicator de la condizion economich familièra) per smendrèr l cost:

Vegn ametù a contribut la families che se emprevèl del servije per:

- bec dai 3 meisc ai 3 egn enciasé te comun

- bec dai 3 ai 13 egn, tel temp fora de scola, enciasé te comun.

L smendrament del cost, donca la soma del contribut, l é:

Min € 4,40* (con coefizient ICEF no declarà, valif o maor che 0,35)

Max € 6,90 a l’ora (con coefizient ICEF valif o mender che 0,15)

* se se à n l icef l che va sorafora l limit o no l vegn portà dant, vegn dat l contribut più bas.

Anter i valores più auc e più basc vegn stabilì na fascia de mudazion de contribut de € 0,50 dat fora aldò de la mudazion del coefizient ICEF de chi che à derit.

L didament economich l vegn dat fora per no più che 160 (centessanta) ores al meis, aldò del contrat sotscrit anter la familia e la coprativa de referiment.

L didament l ge vegn dat a la Coprativa che la smendrarà l cost del servije a cèria de la families.

Vegn ametù a contribut la families che sotscrif n contrat per l servije per i fantolins – Tagesmutter per amancol 20 (vint) ores al meis, fora che l meis te chel che l bez l cogn se fèr ite.

Vegn ametù a contribut la families che se emprevèl del Servije per i fantolins - Tagesmutter amancol per (2) doi meisc a do a do.

Do da la sotscrizion del contrat co la Coprativa per la doura del servije, ge vel scriver ju l formulèr de domana de contribut e ge l consegnèr al Ofize Afares generèi e Assistenza Scolastica del Comun General de Fascia.

La amiscion al sostegn la vegn fata do aer fat l zertament de la ores amò a la leta (no l é na graduatoria) scomenzan da la dì da canche se à scomenzà a se emprevaler del servije.

Per maora informazions se pel tor contat co la coordenadora de raion:

Segnora Francesca Azzali (335.1037141)

fiemmefassa@tagesmutter-ilsorriso.it