I partner
Col projet "Leames" vegn metù en esser na colaborazion con autra realtèdes del teritorie per creèr raporc e per valorisèr i sacotenc intervenc a favor di joegn.
“LA RISOLA”, parola fascèna che vel dir “LA GIRANDOLA”, l’é na metafora che palesa polito la filosofìa che la é a la basa de nosc Pian per i Joegn.
Chesta la vegn raprejentèda desche un fior che à na pèrt zentrèla, e chest l’é l pian di joegn. Dut chel che l’é dintorn, enveze, l’é chel che met adum e che à na relazion col Pian e, donca, i joegn, l desch de lurier, i Comuns, la Provinzia, la firmes, la sociazions... aboncont la Risola la ṥira demò de gra al vent. Donca al Pian, per jir inant, ge serf la forza e la energìa che vegn cà da dut l teritorie; l Pian và inant demò se se tegnon per man e sion duc adum per arjonjer l medemo obietif.
Aon cernù de durèr l’inom fascian per sotrissèr l sens de partegnuda a noscia identità teritorièla e culturèla.
L dit “Da schiussèna a pavel” che vel dir “da bruco a farfalla”, vel palesèr enveze l percors del Pian di Joegn de Fascia che l’é partì più tardif che chi etres, e metù a jir delaìte de n contest olache no l’era mai stat tout cà la politiches di joegn, ma che ades l’é vertech a sgolèr e doventèr n pavel e troèr sia forma e sie esser.
La Scola Ladina de Fascia la ge sporc ai studenc e a sia families na perferida formativa dalbon grana che la se spartesc te cater percorsc educatives:
1. Liceo Artistich con doi sezions "Èrts figuratives" e "Design" (l'Istitut d'Èrt, dò da la reforma l'é doventà l liceo artistich)
2. Liceo Scientifich
3. Liceo Ladin di lengac
4. Ski College, per i joegn che fèsc sport da d'invern a livel agonistich, metù a jir per duc i orientamenc scolastics. L'é la soula scola te duta la Provinzia autonoma de Trent che la ge dèsc l met ai studenc - atlec de balanzèr l temp de la scola con chel del sport.
Vigni an, acioche posse vegnir arsegurà la oportunitèdes formatives e educatives miores, ai studenc del trienie, la Scola Ladina la ge fèsc fèr ativitèdes de orientament dassen enteressantes. Chesta l’é na vida per ge dèr l met ai studenc de se cognoscer, de desfrutèr sia capazitèdes, de lurèr fora sie enteresc e de se confrontèr col mond del lurier.
Informazions dassen ùtoles per cerner con ferstont l davegnir universitèr e / o de lurier. Delaìte de la proponetes de orientament la Scola Ladina la colaborea col projet “Leames”.
Vèrda l sit istituzionèl (apre il link in una nuova finestra)de la Scola Ladina de Fascia.