dr Luigi Chiocchetti
Ve porton dant la letra scrita dal dr Luigi Chiocchetti, Conseier Provinzièl con encèria de President del grop provinzièl e Capogrop regionèl de la Union Autonomista Ladina, con chela che vegn recognosciù e aprijià l lurier endrezà col projet "leames" che ge è stat manà a la procuradora, professora Cristina Donei, en ocajion de la pruma conferenza stampa fata per portèr dant l projet
"Trent, 1m de dezember del 2011
Stimèda Procuradora, cara Cristina.
Te scrive en cont de la conferenza stampa de prejentazion del projet "Leames: in rete con la tua valle".
Descheche te é jà dit a ousc, no podaré tor part ajache son empegnà a Trent te na sentèda del Consei provinzièl.
Aboncont ge tegne a te fèr ruèr mie sostegn e mia lauda per chesta scomenzadiva che vèrda ai joegn e a sia formazion desche patrimonie per la crescimonia de noscia comunanza e desche capital da envestir te la realisazion del ben comun.
Saon duc che l davegnir portarà endesfide semper più senestre, soraldut per comunità pìcole (tant a livel de numeres che de teritorie) desche la noscia.
Per poder ge fèr front e per seghitèr a esser e a crescer, cognon poder far cont su persones injegnèdes, bones de se adatèr ai tempes e ai mudamenc che ne vegn encontra semper più coran.
Persone che abie, se sà ben, ence coscienza de sia reijes e de sia identità, ma che soraldut sapie de poder meter a frut sia inteligenza, si talenc e sia formazion te la val da olache i vegn.
Per fèr chest ge vel ge dèr l met de se realisèr chiò te Fascia, ti ciampes che più ge pièsc e che più ge somea.
Ge vel enjignèr l teritorie, mudèr prospetiva, orir l’orisont a neva possibilitèdes.
Pode dir che l projet "Leames" pel esser la dreta responeta a chisc neves besegnes e spere che duc chi che vegn tocè dal projet i mete en ciamp dut l’empegn e dute le forze che ge vel per l portèr a compiment.
Coi miores augures de bon lurier a duc, Te sporje mie miores saluc.
Luigi Chiocchetti"