Cor Val Fassa
Italiano
Ladin
Del 1970 nasc l “Cor Valfassa” de gra al voler de ciantores da Poza, Pera, Mazin e Ciampestrin, ensema con n grop de l’ex Cor Soracrep da Moena. Chest nef grop l’era metù adum da trenta jent.
I prumes conzerc i é stac metui a jir ja via per l’istà del 1971, olache l’é stat ciantà presciapech vint cianzons anter cheles classiches e de maor nonzech del repertorie SAT. Del 1972 l’à tout pèrt a la pruma rassegna fora da la region tel teater comunèl de Seregno (Milan) arjonjan n bon ejit. Del 1973 l cor l se à smaorà ajachese à enjontà ite dotrei ciantores del “Cor Fiamme Oro”.
Anter duta la trasfertes che l cor à fat stroz per la regions de la Tèlia, cognon recordèr chela che l’à fat a Firenze, aló da la senta destachèda de la Università Americhèna del Colorado a la Poggerina del 1975; na esperienza zis bela, tant per la gaissa desmostrèda dai studenc americhegn, che ence per l bel conzert che l’é stat endrezà a Figline Valdarno. L’é stat endrezà conzerc ence a Assisi, a Gubbio, a Pallanza sul lech Maggiore e a l’Isola d’Elba, e chisc l’é anter chi più bie da recordèr. Per l 25 cedean de la fondazion del cor l’é stat fat na veta con sù, estra che la cianzons classiches, ence dotrei cianzons per ladin, l lengaz de la mère fascian e de autra valèdes dolomitiches.
Ti egn ’90 l cor à tout pèrt a n concors de mùsega internazionèl a Praga olache à tout pèrt ence etres cores che vegnìa da duta la Europa e dò l’à fat ence autra trasfertes emportantes stroz per la Tèlia e foradecà. Del 2005 l cor à fat festa per sie 35 cedean de atività e per chesta ocajion l ge é stat dò n muie de meisc a la realisazion del nef ZD Soreghina; chest l’é stat n suzess, ejit del gran lurier che l’é stat fat, de l’amor e de la gaissa del maester Stefano Vaia, del President Vittorio Trottner e de duc i ciantores che met adum l cor fascian.
De firé del 2010 l Cor Valfassa l’à fat festa per sie 40 cedean de fondazion, con n conzert maraveous fat dal Cor de la SAT de Trent.
Te chest moment l Cor Valfassa l'é sot la bacheta del Maester Stefano Lazzer. Dò che Vittorio Trottner, President, l'é mort, a sie post l'é stat nominà l segnor Bernard Lucio.
