Fronte dei ricordi
Italiano
Ladin
“Béleche a la fin di egn sessanta, de doudesc egn, jie scialdi a chierir reperc con n veie recuperant da Moena su per l Pas de S. Pelegrin. Me recorde franch che enlongiajù la Cima del Costabela l materièl de fer l’era bèleche deldut soravìa l teren e che se ruèa de retorn te paìsc semper col prossach pien e res de reperc. Per n muie de egn é seghità a jir sul veie front de la gran vera e, da gran, me n’é adat che dut chel che vedee e che binèe sù, fajea pèrt de la Storia e che la operes de vera no les cogn vegnir dessatèdes ma les cogn vegnir metudes a post”.
A scutèr la testimonianza de Livio Defrancesco, President de la sociazion “Sul fronte dei ricordi”, se pel entener la reijes e l’obietif de chesta fradaa che da egn la se dèsc jù per tegnir bel rencurà la trincees, la postazions, i troes olache l'é passà i sudé che à scombatù endèna la Gran Vera. La jent dant à abù l met de veder i reperc jan a veder la mostra – museo de Someda (frazion de Moena) e ades, en ocajion del centenee de la gran vera, i medemi reperc i fèsc pèrt de la mostra “la Gran Vera” endrezèda aló da Navalge a Moena. Con chest lurier, portà inant tras n spirit de volontariat, se vel recordèr i riesc momenc e chel che à padì i sudé. Nosc empegn l’é ence n envit a ge vardèr al davegnir con n sentiment de speranza acioche chest no sozede più.
