Grop de la Mèscres de Dèlba e Penìa
Italiano
Ladin
Chi da Dèlba e de Penìa à scialdi abù a cher sia mèscres e coscita, per tradizion, i à semper proà a tegnir sù n bel grop de comedianc che se mete a la leta e che porte inant l’usanza veia e veiora de la maschèredes.
Chi egn l Bufon, l Laché, i Marascons e i comedianc i se binèa fora per la stues de paìsc o te vèlch ostarìa per fèr mascherèda endèna carnascèr.
Se scomenza ai 20 de jené, sègra de Sen Bastian, a Penìa. L Bufon e l Laché, sobito dò marena, i cor stroz per Penia e Dèlba per ge dir a la jent, jan fora per duta la cèses, che da sera, aló da la veia scoles de Penìa, l’é mascherèda, event tant spetà da la jent, con duta la mèscres fascènes tradizionèles, per passèr n moment aiegher, da grignèr e co la mùsega.
Endèna i atores, i Marascons e chi che sona l’orghen da mantech i se bina te stua de Mario de la Ninòtes, enlongiajù la Piaza de Penìa e i speta che rue de retorn l Bufon e l Laché. Penamai che duc é vertesc, en defilèda, con dedant i sonadores, i sauta e i bala, i ge fèsc la roda al festil veie te piaza e dò i va sa la scola veies olache vegnarà desleà carnascèr...
L prum che vegn ite l’é l Laché che l cogn portèr dant dut l grop ajache l’é l’ambasciador e ence l responsàbol di atores, de la mèscres e di museganc. Dò che l Laché à dit sù sie descors, rua ite l Bufon. El l raprejentea la pèrt da grignèr del carnascèr fascian ajache ge vegn conzedù de tor per l cul la jent ence tras matitèdes pesoches, dijan fora e metan al luster co la rimes da grighèr, l bon e l zomp de la persona a chela che l’à dezidù de ge dir sù la matitèda. Dò da la ejibizion del Bufon, rua ite i Marascons: se trata de mèscres simboliches, che à tel dos trei o cater centes con sù i bronsins e che palesa l leam strent anter i bachegn fascegn e la besties che se aea te cèsa, soraldut la vaces che les era de gran didament tant per l lurier fora per i ciampes, che ence per l magnèr percheche les dajea lat e cèrn. Bensegur i Marascons i fèsc sia bela parbuda ajache i vegn ite sutan ensema e fajan sonèr ensema i bronsins. Dò da la ejibizion de la Gran mèscres scomenza la mascherèda; per sòlit se trata de na comedia olache ge vegn dat luster a l’entità ladina – fascèna ti confronc di foresć, che stèsc apede o dalonc da Fascia. Desche cumià rua ite endodanef l Bufon, con vindedò i Marascons e l Laché che l domana perdonanza se l’é stat fat fai, ma soraldut de tirèr fora l tacuin fajan capir che nience l cian mef la couda per nia. Donca rua ite i museganc che co l’orghen da mantech i va inant co la festa con cianties e bai che dura enscin a la bonora dò.
