Menu di navigazione

Guida alla Val di Fassa

Occhio al gioco

di Mercoledì, 11 Maggio 2016 - Ultima modifica: Venerdì, 01 Febbraio 2019

ita-IT Italiano lad-IT Ladin

Immagine decorativa
Località
Vich
Referente
Marino Pederiva
Ruolo del referente
President
Scheda

“Occhio al gioco” no l’é bele demò n slogan, ma l’é na sociazion che la é de contra al jech a scioldi e che se dèsc jù per ferèr chest fenomen te Fiem e te Fascia. La neva sociazion la é stata portèda dant te senta del Comun general de Fascia da Marino Pederiva, jiador pentì. Dò aer perdù temp e scioldi, anché chest lezitent om fascian l’à mudà deldut sia vita: l’é n om che vel didèr chi che croda te chesta situazion de la dependenza dal jech a n vegnir fora. La “Vera de Marino” la é pontèda via canche l'à orì na piata Facebook, e dò la é jita inant tras n placat olache se pel l veder sentà jù visavì a n aparat “magna scioldi”: placat che, ence de gra al web, l’é stat tacà fora te dut l Trentin. Tinùltima l’à enjignà ence n adesif da poder tachèr sù su la fenestres di bares che é de contra a chisc aparac da jech. N sìmbol de na dezijion etica che podon veder ence fora per i locai de Verona o de Genova. L zil che se met dant la sociazion “Occhio al gioco” l’é chel de smendrèr l numer de la persones che croda te la dependenza dal jech a scioldi, estra che chel de smendrèr l numer di aparac magna scioldi fora per i bares e i tabachins. “Con chest no se vel demonisèr l jech – à despiegà Marino Pederiva – ma fèr entener i problemes che à creà l jech, chi che l crea e chi che l podarà creèr. Nosc obietif l’é chel de fèr rei, de stravardèr l teritorie, de doventèr pont de referiment per la persones dependentes dal jech ma ence n meso per l sparpagnament de neva ocajions. Volon lurèr ensema co la istituzions percheche l jech a scioldi no l’é demò n problem personèl, ma de duta la sozietà.