ASD Moena Sport Ginnastica
Italiano
Ladin
L’A.s.d. “Moena Sport Ginnastica” l’é na sociazion de sport diletantistica che la ge sporc a bec e bezes, tant pìcoi che mìngol più gregn, te la valèdes de Fiem e Fascia, corsc de ginastica ritmica, artistica e de arcedament per de autra sorts de sport.
La sozietà la nasc del 2004 e la met dant per la pruma outa te noscia valèdes l sport olimpich de la ginastica ritmica, che enscin enlouta l’era delbon pech cognosciù. Coscita, te palestra del Zenter Scolastich de Moena, vegn endrezà la pruma lezions co la ensegnanta Antonia Bruno.
Duc i istrutores i seghita a miorèr sia formazion, tant dal pont de veduda tecnich che uman, con corsc de agiornament te sie setor e per chel che vèrda la segureza.
Duc i egn la sozietà se cruzia de endrezèr garejèdes regionèles de la FGI o de la CONFSPORT/ASI; la enjigna la desmostrazion da Nadèl e chela de la fin de l’an; la tol pèrt a manifestazions locales (zerimonia de orida de la Marcialonga, spetacoi en ocajion de evenc endrezé dal Comun de Moena).
La endreza e la met dant ence stage via per l’istà adum con sozietèdes de serie A col didament de tecnics taliegn e da foradecà e setemènes de arcedament spezifich per tachèr endò l’atività, te cheles che vegn fat n gran lurier per enjignèr i bec dal pont de veduda fisich e per meter adum i esercizies aldò di programes de la garejèdes en program via per l’an.
