Bogn da nia
Italiano
Ladin
Del 1997, d’uton, n grop de amisc à dezidù de jir coi schi da mont a cena sun Ciampac… enlouta la jent no jia trop coi schi da mont, l’era n sport no tant cognosciù, descheche enveze l’é anchecondì.
Embendapò i à dezidù de jir amò n'outa... e coscita, n meis dò, i se à binà endodanef per jir sun Ciampac... l grop scomenza a tor ite ence autra jent... no l’era cronometres ma demò gran estro de se goder...
A la fin de una de chesta raides fates dò vea, nasc l grop BOGN DA NIA… Ti meisc dò se à dezidù de meter en pe n consei diretif con n president, n secretèr e i conseieres...
I à scomenzà a endrezèr, estra che la raides dò vea, ence raides de domenia con percorsc desvalives... duc, aldò de sia capazitèdes, podea cerner sie percors. Aboncont la jent scomenza a jir semper de più coi schi da mont, l’é stat metù a jir la pruma garejèdes coi sci da mont do vea e nasc i prumes sci club.
Del 2000 l president, Dantone Ennio, l porta dant la pissèda de meter a jir na lingia de garejèdes coi schi da mont dò vea…vegn metù a jir l Trofeo Cianci.
Estra che meter a jir garejèdes, i membres cronometrea e i dèsc na man te desvaliva garejèdes metudes a jir da etres gropes e sci club amisc, garejèdes coi schi da mont, garejèdes de corsa sa mont...
L’é mudà sacotanta robes te chisc egn, encomai duc é enjigné e arcedé e fazilmenter no i proa più chel gust de stèr adum e de se goder… aboncont i Bogn da nia d’invern duc i meisc i endreza na raida dò vea coi schi da mont fora per la uties de Fascia…co la medema gaissa di prumes egn, col medemo estro de se goder, zenza se desmentièr che se trata demò de n grop de amisc che à amor de jir sa mont.
