Calcio Fassa / Fascia Balon
Italiano
Ladin
La sozietà de balon la nasc del 1978 co l’inom A.C. Vigo di Fassa de gra al gust per chest sport palesà dai fondadores Giulio Rizzi, Andrea Weiss e Guido Loss, col gran didament e l sostegn de Walter Ghetta. L prum grop de sorastanza l’é metù adum da Duilio Durigon (President), Saverio Sommavilla (Vizepresident), Antonio Ghetta (canzelist), Guido Loss (cassier), Antonio Camerano, Corrado Trentin e Walter Ghetta (conseieres). L Vizepresident Saverio Sommavilla l’é stat ence l prum a fèr da sponsor de la squadra ge dajan l met a la sozietà de peèr via e de poder paèr jù la pruma speises paan con sie scioldi la pruma maietes. La sozietà la é nasciuda bèleche per cajo. Timpruma no l’era scioldi e no l’era nience n ciamp da balon per se arcedèr: i bec i se binèa dò vea sul prum pra che i troèa e aló i proèa i prumes schemes de jech, ge coran dò al balon per dotrei ores. Col jir inant del temp l’endrez de la sozietà l’é mudà e l se à miorà, ge lascian la lèrga e la possibilitèdes ence a sacotenc bec e joegn de jièr a balon. Da n muie de temp l Fascia Balon l’à na pèrt zis emportanta delaìte de la sozietà de Fascia: sion stolc de esser stac bogn de fèr madurèr, dal pont de veduda sportif e moral, n muion de bec. Nosc obietif no l’é demò chel de endrezèr la atività agonistica, ma se cruzion ence de tor dant squadres de balon, tel passà ence squadres de la serie A e B, estra che de endrezèr stage de desvaliva squadres de joegn, per ge fèr reclam a noscia val e per la fèsc cognoscer stroz, smaoran ence l’economìa. Estra che se cruzièr de endrezèr dotrei tornoes di joegn, dal 2001 en cà endrezon ence l “Tornoi di volontadives”, manifestazion con garejèdes de balon olache tol pèrt la sociazions de volontariat de val desche i studafech, la mùseghes, la crousc checena e biencia, i gropes AVIS, i gropes da folclor e chi de la mèscres, i gropes miscionères e c.i. É dassen gust e son stolz de rejer chesta bela sozietà dal 1990 en cà e per chest voi ge sporjer n gran develpai a duc chi che me stèsc apede. Zenza sie didament no fosse mai stat bon, anzi no fossassane mai stac bogn de fèr dut chel che l’é stat fat enscin a ades. L’empegn de l’AC Fassa l’é dassen gran, ence dal pont de veduda finanzièl. La aministrazions e la firmes publiches e privates de Fascia les ne é scialdi states apede. Soraldut volesse ge sporjer n gran develpai al comun de Vich che, esta che sostegnir noscia sociazion, l se à tout sù ence la speises de gestion de nosc ciamp da balon, l ciamp sportif de Cotura. Cognon recognoscer e ge dèr valor a dut l lurier che l’é stat fat te chisc egn e de jir inant acioche nesc bec troe semper desponibilità e profescionalità per madurèr tel setor del sport e te la vita. Forza Fassa!
Gualtiero Walter Ghetta – President Fascia Balon
Piata internet ofizièla del fascia balon: www.fassacalcio.it
