L ciamin
I ciamins de na cèsa, soraldut chi de n fornel o de n sporert, l cogn vegnir neteé aldò del Regolament de Comun.
La rejons per cheles che ciapa fech na cèsa
De fat, l servije de netijia di ciamins, che l’é de òbligh te vigni Comun (aldò de l’art. 14 L.R. dai 20.08.1954, n. 24 e m.f.d.), l vegn sport a na vida direta dal Comun opuramenter l vegn fat da firmes privates che à i requisic de lege. I ciamins di fregolères i cogn vegnir neteé amàncol una outa a l’an (ti Comuns da mont desche chi nesc, che i é a passa 700 m.s.l.m., l’é en esser l’òbligh di neteèr ence doi outes a l’an). I fregolères a gas enveze, i à besegn de pecia manutenzion, e te chest cajo l’é pervedù di neteèr demò una outa ogni doi o trei egn. Aboncont se cogn semper fèr referiment al Regolament de Comun. Per se fèr scoèr jù la raza se cogn se oujer a jent spezialisèda e no l’é benfat se rangèr. Dut chest percheche l personal calificà l podarà verifichèr se l ciamin l’é entrìech e segnalèr se fossa ite sfesses o vèlch che podessa fèr vegnir fora fech te ciamin, soraldut te chela pèrt de ciamin che passa fora l sotcuert. Aer la sfesses te ciamin ma ence aer la raza no scoèda: con chesta condizions te cèsa, te Fascia, ma ence te etres paìjes da mont, ogne tant crepa fora fech te cèsa. Canche l’é fech te ciamin, se vegn fora na sfiamenèda, o se l’é vent sut e freit che ciucia sù la bolifes, la raza la podessa ciapèr fech. La ciapa fech sobito e, de gra al passaje de l’aria, la èrt belebon prest e doventa sobito dut fers. Per solit dut chest l sozet te 10 / 15 menuc e se sent n gran rumor e vibrazions. Da ciamin vegn fora sfiamenèdes, e te ciamin avert e da la sfesses vegn fora fum che entessea. Chisc l'é evenc che sozet soraldut canche taca a vegnir freit, ti dis con vent sut.
Col ciaut l parei daìte l doventa fers e i parees del ciamin e di mures enlongiajù i pel se sfener, col gran pericol che ence la mobilia e i treves di cuerc ciape fech. Endèna, ma ence dò, te ciamin vegn jù bronzes e toc de cadrìe che èrt, che podessa sutèr fora da la bocia del fregolèr e sutèr jabas, brujan l fon, fajan èrder autra legna, tapees e dut chel che pel ciapèr fech. Dal de fora la bolifes les vegn fora da ciamin e les pel crodèr sun vèlch che podessa ciapèr fech
Dotrei consees
I ciamins i cogn vegnir fac sù dalvers, se cogn perveder un fech per vigni ciamin, i cogn jir sù dret co la medema mesura su e su, zenza utèdes o ertes, e i cogn aer na bona isolazion termica (soraldut dai treves de legn). Se cogn meter sù n ventil per serèr l’aria e se cogn verifichèr duc i dis che no vegne fora crepes sui pares olache passa l ciamin, da olache podessa vegni fora fum che entessea e fech. Brujà legna secia, zenza rèja, zenza elech o catram. A tizèr no durà alcol (durà piutost prodoc aposta desche la diavolina). Per sbetèr l cender, usave a durèr n bidon de banda e no tegnilo daìte. No sbetà l cender te bidon da les scoadìes.
Se l ciamin ciapa fech fajé coscita: no stajé a ge petèr jù èga; se l’èga tocia i parees fersc, l mur se podessa crepèr; estra apede co la prescion del vapor chest l podessa no tegnir più permez e se sfregolèr. Podede bagnèr mingol la legna ma no stajé a bagnèr i parees. Chiamà de fata i Studafech drucan l 115! Fajé chel che podede per no fèr jir ite aria dal bas; serà l ventil de l’aria, opuramenter la portina; se l’aede a la leta, durà l’estintor, semper dal bas. Tolé demez la mobilia e i ogec enlonjiajù l parei del ciamin
L carbon monoxide
Che él pa, e co peste pa te defener da chest gas mortal, che no se veit e che no à odor, e che d'invern l copa sacotanta jent fora per la cèses?
Da olà vegnel pa cà?
Te cèsa l pel vegnir fora da fregolères, ciamins, borei, fornìe, sciaudabagnes, motores, fiames e bronzes ti locai olache no vegn spalancà trop la fenestres, donca te bagn, te cojina, te caldaia e te vigni sala olache l'é vèlch che bruja. Ma ence da l'auto o da n motor lascà empeà te n local serà. Serf che sie semper na fenestra o n bochier o vèlch che desçèria l'aria de fora.
Perché pa d'invern?
Se cogn dir che chesta desgrazies les pel sozeder canche mai fora per l'an, ma les sozet soraldut d'invern percheche:
- se empea l sciudament te cèsa, ence i impianc no segures;
- se sera trop la fenestres e i ujes; l gas l podessa jà esser te l'aria, ma co la fenestres spalanchèdes l jissa fora zenza fèr dans, ma co la fenestres serèdes l resta ite;
- la jent la stèsc de più te cèsa, donca les é maormenter sotmetudes al risech da entesseament;
- vèlch outa, acioche no vegne ite l freit, vegn stropà i bujes de l'aria o i tubi per fèr jir fora l fum.
Co copel?
L CO l'é n velen che, canche se tirà l fià, l rua tel sanch al post de l'òssigen: a la zelules del corp ge mencia l'ossigen e donca l cervel no l va coche l cognessa jir e se vegn peres, se stenta a se mever. L'é sche aer la petorcena. Con na maor cantità de gas se stenta a tirèr l fià, a se mever e donca se va en coma e se mer. Bèsta demò 10 menuc. L risech l'é più aut per la jent de età (chi che à passa 75 egn) e per i fantolins (sot i 4 egn). Più gas l'é e più pericolous l'é. Bèsta pèch per morir. Per varir da n entesseament tel sanch serf n tratament te cambra iperbarica con cures particolères e te podesses aer dans per semper.
Che él pa, olà se fèjel pa?
L'é n gas che no se veit, che no à odor, che no à saor e che l'é più pesoch de l'aria. L se fèsc canche i combustìboi fosii (penzin, legnam, ciarbon, gas metan e propan, gpl, elech) no bruja del dut, canche mencia l'aria o canche n'é pecia. La combustion la consuma l'ossigen de l'aria e la produsc desvalives gas, anter chisc l'anidrida de carbonium (che no fèsc nia). Te n post serà, o olache no vegn mudà trop l'aria, l'òssigen l vegn consumà coran, e canche no n'é trop, la combustion la produsc l monoxide. Sia formula chimica l'é CO (= 1 àtom de carbonium e 1 de ossigen); enveze la formula de l'anidrida de carbonium l'é CO2 = 1 àtom de carbonium e 2 de ossogen). Chest gas l bruja e vèlch outa pel ence scopièr dut. L'é più pesoch de l'aria, donca l se depojitea via per bas e jù per la scèles, e no se l veit.
Co fèste pa a te n ascorjer?
No se l veit e no l'à odor: no l'é sorì se n adèr de l respirèr. Chest che vegn scrit ades, l podessa sozeder ence per autra rejons, ma se te te n ascorjes, l'é miec controlèr de fata: l carbon monoxide l copa!
La fiama la é de color šal / pomaranc (te cojina, sciaudabagn) - la cogn esser bruna o bruna chièra, trasparenta e zenza fum. N segnèl ti fornìe a gas l'é l folim che se encrostea e l fum, che no cogn esser, se bruja dalvers. Pìcola fiames brun scur da na man del fech (senester da veder). Mèl de cef e fiacheza, soraldut canche te leves da doman; la pruma persones, o besties che padirà, sarà chi che stèsc più en bas, donca i più pìcoi, la jent sentèda jù o te let. L col te graza, te ès festidech tel nès e brujor de eies. Ma chest pel mudèr aldò de coche l'é la persona. Mèl ai eies, che bruja e che slègrema, e te ès la grasala che bruja e te stentes a tirèr l fià. Te sa de sofoèr. Dut chest pel sozeder soraldut canche l'é l carbon monoxide. L cian, l giat e la picola besties i é straches e i somea cioches.
Peisseste che tia cèsa sie entesseèda?
Leva sù e tirà l fià più en aut che te pes; spalanca de fata la fenestres e i ujes e destuda dut chel che l'é dò a brujèr. Recordete che l carbon monoxide l vegn fora ence da la brozes, donca destudeles ge sbetan soravìa èga e porteles defora. Fà levèr sù chi che l'é te let o sentà jù, scomenzan dai bec e da la jent de età e recordete ence de la besties. Se te veides na fiama šala o pomaranc tel gas de la cojina o del sciaudabagn, destuda dut e fagelo veder a n espert, no stèr più a l'empeèr. No jir te cèneva o te cambres zenza fenestres; l gas l se bina jubas e te despensa.
E se te l'ès tirà sù?
Spalanca de fata fenestres e ujes e se tu es de fora, spaca l vierech. Tira l fià sun fenestra o defora; fate menèr te ospedèl da zache, no vidèr tu, te podesses vegnir pere; piutost chiama i socorsc ge metan dant tie problem al personal. Per varir da chest entesseament serf cures spezièles.
Co peste pa te defener?
Te duc i lesc olache l'é na fiama o brozes se cogn mudèr l'aria, (busc per l'aria o vèlch che fae jir l fum de fora); te la sales olache l'é fornìe a kerosene o gas, cogn esser n busc aposta per l'aria orì; no stropèr i bujes per l'aria jà en esser; fage fèr la manutenzion duc i egn ai fornìe, ai sciaudabagnes e a la caldaies, verifican che no sie vèlch de encrostà; destuda l motor a combustion (no eletrich) te locai seré, ence se l'usc l'é avert, percheche l gas l podessa ruèr te cèsa e l'aria che passa no la podessa esser assà percheche no sie più entesseament, gei fora da garasc co l'auto per sciudèr l modor; met sù n aparat aposta de alarm col dispositif per l carbon monoxide; vèdege dò a man a man al ciamin, acioche no l'abie ite sfesses che fèsc ruèr l gas fora per la cambres; l fregolèr per rostir (gradeles che và col ciarbon) l produsc CO; se cogn l durèr semper defora, mai te cèsa o te garasc; canche te compres na cèsa o te la fites, fage veder coche l'é metù l'impiant del sciudament, del gas, de la cojina a n tecnich, estra che coche l'é spartì cèsa e garasc. Sul camper, su la bèrca e te tenda emprevaleve de impianc de sciudament eletrics; no durà combustibol fossil (gas, penzin, ciarbon e c.i.); te la bèrca, daìte, podessa esser gas che entessea vegnù cà dal motor;
Che che porta aer tirà sù CO
(da : James H. Meidl, Explosive and Toxic Hazardous Materials, Glencoe Press, 1970, Table 28, p. 293)
Conzentrazion (pèrt per milion) Sintomes:
100 livel limit per no aer efec ence dò l'aer respirà per 6/8 ores;
200 mèl de cef no tant fort dò 2/3 ores;
400 mèl de cef e uria dò 1/2 ores;
800 mèl de cef, uria e stornijies dò 45 menuc; te ciapes l bot e te vegnes pere dò 2 ores;
1,000 te vegnes pere dò 1 ora;
1,600 mèl de cef, uria e te vegnes pere dò 20 menuc;
3,200 mèl de cef e stornijies dò 5/10 menuc, te vegnes pere dò na mesora;
6,400 mèl de cef e stornijies dò 1/2 menuc, te vegnes pere e te podesses morir dò 10 /15 menuc;
12,800 efec fisiologics spedienc, te vegnes pere e te podesses morir dò 1/3 menuc.