L salut de nosc Comandant
En jebia ai 27 de mèrz l é stat chiamà ite la assemblea generèla per la litazions de nosc Comandant.
L nef Comandant Franco Pellegrin
L Comandant che à lascià su sia encèria, ge à sport sie gran develpai a duc chi che à tout pèrt, e do l à tout la parola l’Ispetor Distretuèl Debertol che l à metù ju n bilanz del servije che te duc chisc 15 egn à sport l Comandant Ghetta, tant per sie grop che per l diretif de la union distretuèla. Ence l ombolt Fontana l à volù sporjer n gran detelpai, recordan chel che el l aea dit te sie ultim consei de comun, conferman che la aministrazion de comun, desche semper, la sostegnarà scialdi l grop di studafech.
Aldò de la litazions fates per nominèr chi che vegn do da Ghetta, l é stat lità Franco Pellegrin, vizecomandant de 41 egn e studafech da passa 20. Desche vizecomandant l é stat nominà Alessandro Lorenz, ence el de 41 egn e studafech da passa 20 egn. Desche canzelist del grop l é stat confermà l’ex comandant Ghetta Fiorenzo
L Comandant che à lascià su la encèria Ghetta Fiorenzo
Via per de mèrz é cognù lascèr su mia encèria de comandant di studafech de Vich perchehe é arjont l’età (cogne jir en penscion). Per chesta ocajion en jebia sera, ai 6 de mèrz, a la fin del consei de comun (de chel che son conseier de mendranza) l ombolt, con mia gran marevea, l à volù me rengrazièr a inom de duta la comunanza de Vich, me donan na bergamina e na statua zipièda de Sènta Berbola desche recort per mie 38 egn de servije desche studafech, de chisc 15 desche comandant. Voi ge sporjer n gran develpai a dut l Consei de Comun per chest bel recognosciment abù per mia persona, ma voi rengrazièr de cher duc chi che te chisc egn me é stat apede. Soraldut l ispetor distretuèl Debertol Rinaldo per l servije sport per nosc grop, la aministrazions de comun states te chisc egn, ma più che auter la pruma aministrazion Fontana, l ex ombolt Maurizio Detomas e la aministrazion de ades. Voi recordèr ence duc i diretives di studafech nominé te chisc egn; detelpai de cher soraldut a mie vize comandanc Trottner Paolo e Weiss Giuseppe e al vize atuèl Franco Pellegrin, mie pecont strent, per dut l didament che i me à dat, a duc i studafech che con gran gaissa i a sapù portèr inant chel sens sćiantif del volontariat che ne lea. No posse me desmentièr dut l sostegn che ne à dat l consorzie eletrich de Poza, la sozietà “Catinaccio”, la casses rurèles Raiffeisen de Neva Talièna e la cassa Rurala Val di Fassa e Agordino, e duc nesc sponsor del calandèr. N gran detelpai ence ai sentadins de Vich e ai ghesć che ne deida, ne dèsc gaissa e che ne sostegn dal pont de veduda finanzièl.
Ghetta Fiorenzo