Crousc Biencia Cianacei
Ladin
Italiano
Ti egn ’60 – ‘70 te noscia val pea via l turism, soraldut chel da d’invern. I schiadores no semper i era esperc e scialdi i se fajea mèl su per chisc portoes.
Jir en socors de chi che se fajea mèl, per desvaliva rejons, no semper l’era sorì; se podea se basèr demò su la professionalità di dotores publics, che te chi egn l’era i soi che l’era a la leta, e l servije de trasport de chi che se fajea mèl l vegnìa sport demò da dotrei privac che aea mesi de trasport. La soula ambulanza a la leta te val la era sa Vich e la era gestida da la Crousc Checena.
Ti egn ’70, la aministrazion de Comun de Cianacei la ge à domanà a la Crousc Checena de meter sù na sezion ence te la val de sora a na vida da poder entervegnir te duc i besegnes, aboncont da Trent i se à palesà de contra a la proponeta ajache, pèrto sia, per corir dut l raion, bastèa la senta de Vich.
Del 1974 la Crousc Biencia de Busan l’à metù a la leta na ambulanza per la val de sora che la gé é stata consegnèda ai volontères de Cianacei ai 22 de oril del 1974. Se trata de noscia pruma ambulanza… ajache enscin a chel moment se se aea emprevalù de n meso de gra al contribut del comun de Cianacei.
Donca nasc la sezion de la Crousc Biencia de Busan e vegn nominà l prum “capo sezion” che l cogn fèr fora sacotenc problemes, soraldut finanzières. Del 1981 vegn dat jù la stimes, da man di sozi, per l passaje da la sezion de Busan a chela de Trent; dut chest serf percheche no se ciapèa i contribuc da la Provinzia de Trent ajache la senta de la sociazion la era fora da la provinzia (Busan).
Del 1984 vegn metù sù a na vida ofizièla la Sociazion Crousc Biencia de Cianacei che zacan la doventa autonoma; donca vegn metù jù n statut e n regolament intern e vegn lità n Consei Diretif.
Del 1988 la aministrazion de comun de Cianacei la ge consegna a la sociazion Crousc Biencia la senta te str. Dantone.
Del 1996 vegn sotscrit la pruma convenzion con Trentino Emergenza 118 e vegn tout sù ence personal dependent per poder sporjer miec l servije pervedù con chesta convenzion;
Con chesta convenzion vegn pervedù de corir l raion di comuns de Cianacei, Ciampedel e Mazin 24 ores sun 24 e per 365 dis l’an. La convenzion la é amò en esser anchecondì!
Del 2000 dapò, se scomenza a lurèr fora l projet per la senta de ades te Ciasates e che via per l 2000 la ge é stata consegnèda a la sociazion Crousc Biencia, al grop di Studafech da Cianacei e al grop de Socors da Mont.
Trop é mudà dal 1974 a ades, e l’é de gra ai sozi fondadores e a duc i volontères che à sport e che amò ades sporc sie servije delaìte de noscia Sociazion, che la Crousc Biencia da Cianacei l’é doventà na gran realtà.