Download "File di How to complete the application"
(File di tipo pdf di 2,55 MB)
FIT DE N CARTIER PUBLICH CON PAAEMENT SLEJIERì
di Martedì, 14 Ottobre 2025 - Ultima modifica: Venerdì, 06 Febbraio 2026
Italiano
Ladin
FIT DE N CARTIER PUBLICH CON PAAEMENT SLEJIERì
L fit de cartieres con n priesc slejierì, de proprietà o che à la leta ITEA S.p.A. l ge vegn resservà a chela families che stenta da n pont de veduda economich o che vif te na condizion de dejèje abitatif che à i requisic pervedui da la lege provinzièla dai 7 de november del 2005, n. 15 e da sie regolament de esecuzion aproà con Decret del President de la provinzia dai 12 de dezember del 2011, n. 17-75/Leg
Ge vel portèr dant la domanes online con azes tras SPID-CIE o CPS/CNS te la sezion “Stanza del Cittadino” de la Provinzia Autonoma de Trent drucan chest link:
TE PES DOMANÈR DE PODER TOR A FIT N CARTIER PUBLICH SE:
- te es n sentadin talian o de n auter Stat de la Union Europeèna
- te es n sentadin extracomunitèr con lizenza de sojornanza UE longia opuramenter te ès na lizenza de sojornanza curta per lurier o te es enscinuà ta listes de lurier
- te ès la residenza per amancol trei egn te la Provinzia de Trent
- no te ès abù condènes, ence no definitives, o no l é stat metù en doura la pena aldò de la domana de la pèrts ti caji pervedui dal art. 3 bis del decret lege dai 14 de aost del 2013, n. 93, doventà, con mudazions, la lege dai 15.10.2013 n. 119, che met dant “Desposizions de prescia en cont de segureza e per ge dèr de contra a la violenza de jender, estra che en cont de protezion zivila e de comissariament de la provinzies (reac pervedui dai articoi 564, 572, 575, 578, 582, 583, 584, 605, 609-bis, 609-ter, 609-quinquies, 609-sexies e 609 –octies del codesc penal).
TE PES PORTÈR DANT NA DOMANA PER TOR A FIT N CARTIER PUBLICH SE TIA FAMILIA:
- L à n ICEF mender che 0,23
- No à o no à abù n derit de proprietà, de godiment o per jir a stèr te n cartier adatà ti ultimes 3 egn
- No la é stata condanèda a na vida definitiva, ti diesc egn dant, per delic no colpousc per chi che la lege perveit de ruèr te perjon per più che cinch egn, ma ence per i reac pervedui dal art. 380, coma 2 del codesc de prozedura penala
CHE VELEL DIR FAMILIA?
L nucleo de familia l é chel che vegn fora da la zertificazion anagrafica del comun de residenza. Se vegn conzedù l cartier l nucleo de la familia cogn esser medemo che chel segnalà te la domana, fora che se entravegnissa chesta situazions:
- Mort de n component
- Nasc fies
- Inclujion o esclujion del om/femea, convivent more-uxorio del domandant o di fies di medemi
CHE CHE VEGN DECLARÀ CO LA DOMANA
Canche vegn portà dant la domana l domandant l declarea si dac anagrafics e de aer i requisic per l azes al didament, estra che duc i elemenc che serf per l calcol di ponc e donca per meter ju la graduatoria.
La suma di ponc per meter ju la graduatoria la vegn determinèda, con referiment al fech del domandant, tegnan cont de la condizion economich-patrimonièla (ICEF), de la condizion de la familia e de chela de olache se vif e se laora
Canche vegn metù ju la declarazion ICEF, ma ence canche se ge porta dant la domana al ent local, l domandant sotscrif declarzions sostitutives de zertificazion e de at de notorietà aldò di articoi 46 e 47 del D.P.R. 445/2000. Chesta declarazions les cogn vegnir scrites ite con gran atenzion, tegnù cont de la conseguenzes penales pervedudes per aer declarà faussità e che se pert i benefizies che vegnissa conzedù aldò de la declarazions fausses.
CANCHE VEGN VARDÀ FORA LA DOMANES, VEGNARÀ DOMANÀ CHISC DOCUMENC
- cont contributif (dat fora da INPS) del component con più egn de lurier
- zertificat de pediment (se l fossa)
- permiscion de sojornanza (per sentadins extracomunitères)
- zertificazion che desmostra la provenienza da strutures, enc, aziendes residenzièles de cura, assistenza, azet e recuperament (se la é)
- provediment de afidament fies o de nomina tutor (se l é)
- Sentenza de spartijon legala o de anulament del maridoz col obligh de zeder la cèsa (se l domandant/a l é/la é spartì/ida – desmaridà/èda)
Per informazions e suport a scriver ite la domana se pel se oujer al Servije Tecnich del Comun General de Fascia a chesta direzion: tecnico@cgf.tn.it o telefonèr al numer 0462754500 dal lunesc a la jebia da les 8:30 a les 12:00 e da les 14:00 a les 16:30, de vender da les 8:30 a les 12:00.
