Download "File di ISTRUZIONI COMPILAZIONE DOMANDA"
(File di tipo pdf di 1,95 MB)
CONTRIBUT INTEGRATIF PER L FIT
di Mercoledì, 14 Gennaio 2026 - Ultima modifica: Lunedì, 26 Gennaio 2026
Ladin
Italiano
L contribut integratif per l fit per cartieres fité sul marcià ledech l ge vegn conzedù a chela families che vif te na situazion ria dal pont de veduda economich o de dejèje abitatif, che à i requisic pervedui da la Lege provinzièla dai 7 de november 2005, n. 15 e dal regolament de esecuzion de referiment, aproà con Decret del president de la provinzia dai12 de dezember del 2011, n. 17-75/Leg.
Ge vel portèr dant la domana online con n azes tras SPID-CIE o CPS/CNS jan te la sezion “Stanza del Cittadino” de la Privinzia Autonoma de Trent, drucan chest link: https://servizidigitali.provincia.tn.it/lang/it/servizi/contributo-integrativo-alla-locazione-sul-libero-mercato-anno-2026/access (apre il link in una nuova finestra)
Per poder portèr dant la domana de contribut integratif per l fit ge vel aer chisc requisic:
REQUISIC DEL DOMANDANT
- esser n sentadin de la Union Europeèna; opuramenter aer la permiscion de sojornanza CE longia opuramenter aer la permiscion de sojornanza per doi egn per meter a jir na atività de lurier regolèra da dependent o n lurier autonom o enscinuazion te la listes di Zentres per l lurier.
- residenza anagrafica te n comun de la Provinzia de Trent da trei egn fora per fora, canche vegn portà dant la domana
REQUISIC DE LA FAMILIA
1) Indicator de la condizion economica patrimonièla (ICEF) no maora che 0,23 ponc.
Te la valutazion de la condizion economica de la familia vegn valutà ence i vadagnes e l patrimonie del om/femena no spartì legalmenter, ence se no l/la fèsc pèrt de la familia. Enveze no vegn valutà i vadagnes e la condizion economich-patrimonièla de la persones che se cruzia de l’assistenza e de rencurèr i componenc de la familia (badanta), ence se les fèsc pèrt de la familia e se les vegn metudes ite tel zertificat anagrafich, tanche les abie n contrat de lurier a temp pien e eclusif.
2) No esser titolères, con referiment ai trei egn dant de canche vegn portà dant la domana, de n derit de proprietà, de godiment o de viver te n cartier adatà, fora che canche l titol de desponiboltà del cartier no l sie più do da na esecuzion imobilièra o da na spartijon legala.
3) Esser titolères de n contrat de fit, registrà a na vida regolèra, sotscrit aldò de la normes de derit comun en cont de fic de de cartieres per jir a stèr aldò del articol 2 de la lege dai 9 de dezember del 1998, n. 431 (regnèda 4+4 de renovament automatich, opuramenter 3+2).
Vegn lascià fora i contrac de fit che fèsc referiment a cartieres con categoria catastèla A/1, A/7, A8, A/9 e i cartieres che fèsc pèrt de la frabica abitativa publica fité con priesc slejierì o con priesc concordà.
No vegn ametù contrac de fit temporans.
L contrat de fit l no cogn esser sotscrit anter om e femena no spartii legalmenter o anter parenc o parenc no direc de prum degré.
Se, do che l é stat portà dant la domana vegn sotscrit n nef contrat de fit, no pel passèr più che 30 dis anter n contrat e l auter (l referiment l é la data de registrazion di contrac). Ge vel meter en consaputa l Comun General, dant da 30 dis da la medema, che l é stat sotcsrit n nef contrat.
CHE VELEL PA DIR “NUCLEO FAMILIARE”?
L “nucleo familiare” l é chel che vegn fora da la zertificazion anagrafica del comun de residenza.
Per meter a jir intervenc per l stravardament e l sostegn de la eles che à padì na violenza, per la valutazion di vadagnes o economich-patrimonièla de la familia, vegn conscidrà “nucleo familare” chel metù adum da la femena che à padì violenzes e i fies a sia cèria.
CHE CHE SE DECLAREÀ CO LA DOMANA
Canche se porta dant la domana l/la domandant/a declarea sie dac anagrafica e de aer i requisic per l azes al slejieriment, estra che duc i elemenc che serf per calcolèr i ponc e donca per meter ju la graduatoria.
La suma di ponc per meter ju la graduatoria la vegn determinèda, con referiment a la familia del domandant, tegnan cont de la condizion economich-patrimonièla (ICEF), de la condizion familièra e de olache se vif e se laora.
Timpruma ge vel ciapèr la atestazion ICEF, che revèrda la condizion economich-patrimonièla de la familia e do se pel portèr dant domana.
Canche se met ju la declarazion ICEF, ma ence canche se porta dant la domana de contribut integratif, l/la domandant/a sotscrif declarazions sostitutives de zertificazion e de at de notorietà aldò di articoi 46 e 47 del D.P.R. 445/200. Chesta declarazions les cogn vegnir scrites ite con gran atenzion, tegnù cont de la conseguenzes penales pervedudes per chi che porta dant declarazions fausses e che se pert i benefizies conzedui se vegnissa declarà faussità.
Vegn fat controi per verifichèr se la declarazions les é veres.
Se pel portèr dant la domana de contribut dai 15 de jené ai 26 de firé del 2026. Con azes tras SPID – CIE o CPS/CNS te la “Stanza del Cittadino” de la P.A.T.
Se pel portèr dant demò una domana tel teritorie del ent olache l é l cartier e te chel che l domanadant à plindernà sia residenza. La domana la é valevola per una graduatoria demò.
CONTRIBUT INTEGRATIF PER L FIT
L contribut integratif no l pel vegnir metù ensema col benefizie economich a sostegn del paament del fit pervedù dal articol 3, coma 1, del decret lege dai 4 de mé del 2023, n. 48 (Mesures de prescia per la inclujion sozièla e l azes al lurier).
L contribut integratif no l pervegn se vegn recognosciù na suma mendra che 40 euro al meis, o se, tout ju l benefizie economich a sostegn del paament del fit aldò del articol 3, coma 1, del decret lege n. 48 del 2023, vegn fora na suma mendra che 40 euro al meis; no l pel jir dorafora l 50% de la suma che vegn fora dal contrat de fit e no l pel esser più aut che 300 euro al meis.
L contribut integratif l vegn conzedù per doudesc meisc e l pel esser renovà amò per doudesc meisc, portan dant na neva domana. Chi che à ciapà l contribut integratif doi outes, una do l autra, no pel se n emprevaler amò per n trat de temp fora che se te la familia l é ite:
a) un component con n livel de pediment valif o maor che l 75% o con dificoltèdes zertèdes a fèr ativitèdes da duc i dis o encries e funzions particolères aldò de l’età;
b) amancol un component che à se no auter sesantacinch egn;
c) na condizion economica o sozièla stentousa, con apede situazions de besegnes abitatives, valutèda dal ent de competenza per l teritorie che zertea che la familia no é bona de vegnir fora da na situazion de dejèje.
Per informazions e suport a scriver ite la domana se pel se oujer al Servije Tecnich del Comun General de Fascia a chesta direzion: tecnico@cgf.tn.it o telefonèr al numer 0462754500 dal lunesc a la jebia da les 8:30 a les 12:00 e da les 14:00 a les 16:30, de vender da les 8:30 a les 12:00.